روح بخشی ہے کام تجھ لب کا
Wali Dakani (1667–1707)روح بخشی ہے کام تجھ لب کا
دم عیسیٰ ہے نام تجھ لب کا
حسن کے خضر نے کیا لبریز
آب حیواں سوں جام تجھ لب کا
منطق و حکمت و معانی پر
مشتمل ہے کلام تجھ لب کا
جنت حسن میں کیا حق نے
حوض کوثر مقام تجھ لب کا
رگ یاقوت کے قلم سوں لکھیں
خط پرستاں پیام تجھ لب کا
سبزہ و برگ و لالہ رکھتے ہیں
شوق دل میں دوام تجھ لب کا
غرق شکر ہوئے ہیں کام و زباں
جب لیا ہوں میں نام تجھ لب کا
مثل یاقوت خط میں ہے شاگرد
ساغر مے مدام تجھ لب کا
ہے ولیؔ کی زباں کو لذت بخش
ذکر ہر صبح و شام تجھ لب کا