ڈھونڈنے نکلے تھے اپنا نام کس ارمان سے

ڈھونڈنے نکلے تھے اپنا نام کس ارمان سے

ہم صداؤں کے نگر میں رہ گئے انجان سے

انگلیاں یادوں کی تھامے ہم گزرتے ہی گئے

راستے میں موڑ ملتے ہی گئے سنسان سے

دے رہا ہوں عمر کے حاصل کو افسانے کا روپ

ٹوٹتے لمحے بکھرتی ریت کے عنوان سے

دوستوں نے شہ بھی دی ہشیار تھے ہم بھی مگر

فیل گھوڑے پٹ گئے پھر بھی رہے انجان سے

وقت کی جب دھوپ احمرؔ چڑھ گئی دیوار پر

اپنا سایہ دیکھ کے ہم رہ گئے حیران سے