عبث توڑا مرا دل ناز سکھلانے کے کام آتا
Wali Uzlat (1692–1775)عبث توڑا مرا دل ناز سکھلانے کے کام آتا
یہ آئینہ تھا اس خودبیں کو اترانے کے کام آتا
جلایا مصحف دل تو نے کیوں برق تغافل سے
جو سچ بولوں تجھے جھوٹی قسم کھانے کے کام آتا
نہ ملتا خاک میں اس گل کے غم کا اشک اگر میرا
کسی بلبل کے شاید آب اور دانے کے کام آتا
دل صد چاک کا شانہ مرا ٹوٹا ترے ہاتھوں
وگرنہ زلف دود آہ سلجھانے کے کام آتا
لئے عزلتؔ کے موئے سر بیاباں کے ببولوں نے
جو بچتا یہ چنور جاروب ویرانے کے کام آتا