وصل کی شب بھی ادائے رسم حرماں میں رہا

وصل کی شب بھی ادائے رسم حرماں میں رہا

صبح تک میں التماس شوق پنہاں میں رہا

مر گئے لاکھوں شہید ناز کچھ پروا نہیں

وہ تماشائے ہلال عید قرباں میں رہا

کام اپنا کر چکی بیماریٔ عشق بتاں

میں فریب نسخۂ و تاثیر درماں میں رہا

واہ رے پاس وفا اللہ ری شرم آرزو

ہر نفس ہم راہیٔ عمر گریزاں میں رہا

کیا پڑھے اشعار تسلیمؔ جگر افگار نے

شور تحسیں ہر طرف بزم سخنداں میں رہا