چار عنصر سے بنا ہے جسم پاک
ساحر دہلویچار عنصر سے بنا ہے جسم پاک
ہیں یہ چاروں باد و آتش آب و خاک
از پے تکمیل تحقیقات علم
ہو گیا لازم خلی کا اشتراک
عقل و دل ایزاد ہو کر ہو گئے
شش جہات و ہفت منزل تابناک
جب ارادت سے ہوا اس کا ظہور
آ گیا پندار کا گردش میں چاک
روح اعظم سے ہویدا ہو گئی
وہ ارادت جس نے دم کی روح پاک
روح اعظم کیا ہے وہ ذات قدیم
ہے زبان علم میں جو جان پاک
وحدت و کثرت میں ساحرؔ ہے عیاں
جان یا نور قدم یا ذات پاک