گداز دل سے پروانہ ہوا خاک

گداز دل سے پروانہ ہوا خاک

جیا بے سوز میں تو کیا جیا خاک

کسی کے خون ناحق کی ہے سرخی

رنگیں گی دست قاتل کو حنا خاک

نگہ میں شرم کے بدلے ہے شوخی

کھلے پھر رات کا کیا ماجرا خاک

لبوں تک آ نہیں سکتا تو پھر میں

کہوں کیا اپنے دل کا مدعا خاک

بلندی سے ہے اس کی ڈر کہ اک روز

کرے گی آشیاں برق بلا خاک

نہ دیکھا جن کا چہرہ گرد آلود

پڑی ہے ان پہ اب بے انتہا خاک

بیاباں میں پھرا کرتے ہیں شیداؔ

حقیقت میں ہے الفت کی دوا خاک