گم انہیں میں ہوں ان کا دھیان کب نہیں آتا

گم انہیں میں ہوں ان کا دھیان کب نہیں آتا

یاد انہیں بھلانے کا کوئی ڈھب نہیں آتا

ضبط گریہ کی تلقیں ختم کر بس اے ہمدم

بات بات پر رونا بے سبب نہیں آتا

کس پہ جان دیتا ہوں راز ہی میں رہنے دے

نام اس دل آرا کا تا بہ لب نہیں آتا

کیا کہوں اسے پہلے دیکھتا تھا کس ڈھب سے

جو حسیں نظر مجھ کو آہ اب نہیں آتا

جتنے بادہ خوار آئے طالب نشاط آئے

ساقیا کوئی مجھ سا حق طلب نہیں آتا

اتنے غمگساروں سے شاد کیا ہو وہ غمگیں

غم بھی جس کے حصے میں سب کا سب نہیں آتا

تیری کم نگاہی کا طلب کھینچ لاتا ہے

سامنے ترے میں خود بے سبب نہیں آتا

رشک غیر اے منظورؔ ایسے وقت آتا ہے

دوست کے تصور میں دوست جب نہیں آتا