یاں تلک کے ہے ترے ہجر میں فریاد کہ بس

یاں تلک کے ہے ترے ہجر میں فریاد کہ بس

نہ ہوا تو بھی کبھی ہائے یہ ارشاد کہ بس

ایک بلبل بھی چمن میں نہ رہی اب کی فصل

ظلم ایسا ہی کیا تو نے اے صیاد کہ بس

بے ستوں کھود کے سر پھوڑ دیا جی اپنا

کام ایسا ہی ہوا تجھ سے اے فرہاد کہ بس

دل کی حسرت نہ رہی دل میں مرے کچھ باقی

ایک ہی تیغ لگا ایسی اے جلاد کہ بس

عشق میں اس کے بگولے کہ ترا اے تاباںؔ

خاک اپنی کو دیا یاں تئیں برباد کہ بس