حیرت کو مژدہ گرم ہے بازار آئینہ

حیرت کو مژدہ گرم ہے بازار آئینہ

خوبان خود نما ہیں خریدار آئینہ

ہاں عاشقوں کو کشمکش جور سے فراغ

وہ ہے اسیر شانہ گرفتار آئینہ

مجھ کو بھی یوں ہے زانوے حسرت سے واسطہ

تو جیسے ہر گھڑی ہے نگہ دار آئینہ

دلال چشم شوخ ہے قیمت نظارہ ہے

اور حسن بے حجاب خریدار آئینہ

ناکام تری دید سے ہیں خواب میں بھی ہم

لائیں کہاں سے طالع بے دار آئینہ

حسن عمل کی داد سکندر کو مل گئی

وہ رشک آئنہ ہے طلب گار آئینہ