دل جو پہلے ہی سے محو رخ جاناں ہوتا

دل جو پہلے ہی سے محو رخ جاناں ہوتا

کس لئے زلف میں پھنستا جو پریشاں ہوتا

خال کیوں کر نہ قریب رخ جاناں ہوتا

دولت حسن کا کوئی تو نگہباں ہوتا

جذب کرنے کو نہ گر گوشۂ داماں ہوتا

میرے اشکوں سے بپا نوح کا طوفاں ہوتا

جلوۂ مصحف عارض جو نظر آ جاتا

ہندوی خال بھی سو جاں سے مسلماں ہوتا

قدر دیوانوں کی صحرائے جنوں گر کرتا

خار تک بخیہ گر چاک گریباں ہوتا

رنگ تو خیر مسیحائی کہاں سے لاتا

کیوں خجل لب سے ترے لعل نہ ایجاں ہوتا

قیس و فرہاد کا پھر نام نہ لیتا کوئی

مجھ سے آباد نہ گر کوہ و بیاباں ہوتا

روکش چہرۂ دل دار وہ ہوتا کیوں کر

داغ کھاتا جو مقابل مہ کنعاں ہوتا

دل سے گر شوق شہادت کا نہ ہوتا مجھ کو

مثل گل زخم جگر کس لئے خنداں ہوتا

میں وہ مجنوں ہوں کہ صحرا میں قدم گر رکھتا

آ کے پابوس وہیں خار مغیلاں ہوتا

بیڑیاں توڑ کے ہم زلف میں جا کر پھنستے

گر کہیں جوش جنوں سلسلہ جنباں ہوتا

آبرو وہ مرے رونے کی جو کرتا کچھ بھی

اشک سے میرے خجل گوہر غلطاں ہوتا

بہرہ گر دولت اسلام سے کافر پاتا

خال رخسار صنم حافظ قرآں ہوتا

عادت رحم حسینوں میں نہیں جب طالبؔ

کیوں مرے قتل سے وہ ترک پشیماں ہوتا