دل میں رہ کر چھپا کرے کوئی

دل میں رہ کر چھپا کرے کوئی

آنکھ بن کر حیا کرے کوئی

ہم نے مانا وفا کرے کوئی

چارۂ یاس کیا کرے کوئی

اس کی شوخی پکارے کہتی ہے

کھل گئے ہم چھپا کرے کوئی

تری محفل سے فتنہ گر کب تک

درد بن کر اٹھا کرے کوئی

ناز ہے اپنی بے نیازی پر

وقف محنت رہا کرے کوئی

صبر ایوب سے غرض کس کو

شکر نعمت ادا کرے کوئی

رشک دشمن بھی ہے عزیز مجھے

تیری باتیں کیا کرے کوئی

دونوں عالم کو کیا کروں لے کر

قیمت دل ادا کرے کوئی

تو بگاڑے تو پھر بنائے کون

تو جو روٹھے تو کیا کرے کوئی

جرأت ناز تاب فرسا ہے

کیا کہے اور کیا کرے کوئی

سر محشر بھی یہ تقاضا ہے

ہاں ہمارا گلا کرے کوئی

ہائے کس دل سے کہہ دیا اس نے

غیر بن کر ملا کرے کوئی

دولت حسن و عشق بڑھتی جائے

آپ کوسیں دعا کرے کوئی

کاش وہ انتظار مرگ سہی

درد ہو کر دوا کرے کوئی

اپنے آئینے سے مکدر ہو

خاک تم پر مٹا کرے کوئی

دل ہوا ذوق درد سے خالی

اب نمکداں بھرا کرے کوئی

زخم کمبخت جی چرانے لگا

نمک افشاں ہوا کرے کوئی

اے وفاؔ بعد مرزا غالبؔ کے

ہاں غزل یوں لکھا کرے کوئی