دل کے آئینے میں نت جلوہ کناں رہتا ہے

دل کے آئینے میں نت جلوہ کناں رہتا ہے

ہم نے دیکھا ہے تو اے شوخ جہاں رہتا ہے

کوئی دن گھر سے نہ نکلے ہے اگر وہ خورشید

منتظر شام تلک ایک جہاں رہتا ہے

جھاڑ دامن کے تئیں مار کے ٹھوکر نکلے

کہیں روکے سے بھی وہ سرو رواں رہتا ہے

گاہے ماہے اے مہ عید ادھر بھی تو گزر

روز و شب بزم میں تیرا ہی بیاں رہتا ہے

باوجودیکہ مجھے ربط دلی ہے اس سے

یہ نہ پوچھا کبھو ایمانؔ کہاں رہتا ہے