نہیں غم گر خفا سارا جہاں ہے

نہیں غم گر خفا سارا جہاں ہے

خدا کا شکر ہے وہ مہرباں ہے

یہاں فریاد کی طاقت کہاں ہے

وہ ناحق اپنے دل میں بد گماں ہے

نہیں کچھ عشق محتاج بیاں ہے

ہمارا حال صورت سے عیاں ہے

نیاز و ناز عشق و حسن دیکھو

ہمارا سر ہے ان کا آستاں ہے

وفاداری میں گر بے مثل ہیں ہم

ستم میں وہ بھی یکتائے زماں ہے

حقیقت میں ستم ایجاد تم ہو

عبث کچھ جوش پر طبع رواں ہے

وظیفہ ہے مجھے تو نام ان کا

کہ ہر دم ہجر میں ورد زباں ہے

ہمیں تو حال کہنا موت ٹھہرا

تمہارے واسطے اک داستاں ہے

یہاں میں ہجر میں گھبرا رہا ہوں

خدا معلوم وہ اس دم کہاں ہے

حقیقت میں نگاہیں کہہ رہی ہیں

نہاں جس کو سمجھتے ہو عیاں ہے

نظر کے ساتھ تم بھی پھر گئے ہو

وہ پہلی سی محبت اب کہاں ہے

ہمارے واسطے ہے کھیل مرنا

انہیں گر قتل عاشق کا رواں ہے

سکون دل کبھی حاصل نہ ہوگا

ہمارے سر پہ جب تک آسماں ہے

عدو جھجکا تو وہ کہتے ہیں اس سے

چلے آؤ تمہارا ہی مکاں ہے

کوئی اترا نہ اس کے پار اب تک

کہ دریائے محبت بے کراں ہے

وہ کہتے ہیں مری تربت پر آ کر

یہ میرے کشتۂ غم کا نشاں ہے

قضا آئی ہے جو جاؤں وہاں پر

ملک الموت ان کا پاسباں ہے

طبیعت ہے وہی اب بھی ہماری

مگر وہ آپ کی الفت کہاں ہے

نہ ہاجرؔ کو فقط دہلی کا سمجھو

کہ اب وہ شاعر ہندوستاں ہے